फलटण : २५५ फलटण (अ.जा.) विधानसभा मतदार संघातील सर्व नागरिक व मतदार बंधू-भगिनी यांनी आगामी सर्वच निवडणुकांच्या पार्श्वभूमीवर मतदार यादीत आपले व आपल्या कुटुंबातील सर्वांची नावे बिनचूक व फोटोसह असल्याची खात्री करुन घ्यावी, आवश्यक असेल तर दुरुस्ती करुन घ्यावी, तसेच कुटुंबातील ज्या मुला-मुलींचे वय १८ वर्षे पूर्ण झाले आहे, त्यांचे नाव मतदार यादीत समाविष्ट करुन घ्यावे, असे आवाहन आ.श्रीमंत रामराजे नाईक निंबाळकर व आ.दिपकराव चव्हाण यांनी केले आहे.
मतदान आपले प्रथम कर्तव्य समजून सक्षम लोकशाहीची पहिली पायरी म्हणून मतदार नोंदणी करणेसाठी सर्वांनी भारत निवडणूक आयोगाने सुरु केलेल्या मतदार यादी पुनरिक्षन
अभियानास उत्स्फूर्त प्रतिसाद देवून आपल्या प्रभाग, वाडी-वस्ती गाव आणि शहरातील मतदार यादी अद्ययावत करुन घेण्याचे आवाहन करताना याबाबत जिल्हा परिषद, पंचायत समिती, नगर परिषद मावळते पदाधिकारी-सदस्य, सहकारी संस्थांचे पदाधिकारी, सरपंच, उपसरपंच, सोसायट्यांचे चेअरमन, व्हा.चेअरमन, सोसायटी, ग्रामपंचायत सदस्य आणि कार्यकर्ते यांनी, ही जबाबदारी स्वतः स्वीकारुन आपापल्या भागातील मतदार याद्या अद्ययावत करण्याचे आवाहन आ.श्रीमंत रामराजे नाईक निंबाळकर व आ.दिपकराव चव्हाण यांनी केले आहे.
२५५ फलटण (अ.जा.) विधानसभा मतदार संघाचे मतदार नोंदणी अधिकारी तथा प्रांताधिकारी व सहाय्यक मतदार नोंदणी अधिकारी तथा तहसिलदार यांच्या मार्फत सदर काम सध्या सुरु आहे, तथापि आपली लोकशाहीतील महत्वाची जबाबदारी म्हणून आपणही हे काम करणे आवश्यक असल्याचे निदर्शनास आणून देत भारत निवडणूक आयोगाने दि.१ जानेवारी २०२४ या अर्हता दिनांकावर आधारित छायाचित्रासह मतदार यादीचा विशेष संक्षिप्त पुनरीक्षण कार्यक्रम घोषित केला आहे. यामध्ये आगामी वर्षाच्या दि.१ जानेवारी २०२४ या अर्हता दिनांकास ज्या नागरिकांच्या वयाची १८ वर्षे पूर्ण होणार आहेत अथवा झालेली आहेत त्यांनी नमुना नंबर ६ भरुन आपले नाव मतदार यादीमध्ये नोंदवून घ्यावे, सदर पुनरीक्षण कार्यक्रमांमध्ये दि.२ व दि.३ डिसेंबर २०२३ रोजी दिव्यांग, तृतीयपंथी, बेघर भटक्या विमुक्त जाती जमातीच्या व्यक्तींसाठी विशेष शिबीर प्रत्येक गावात मतदान केंद्रस्तरीय अधिकारी (BLO) यांच्या उपस्थितीत आयोजित करणेत येणार आहे. याठिकाणी आपल्या भागातील या मतदारांची नोंदणी करुन घेण्यासाठी आपणही सहभाग घ्यावा असे आवाहन आ.दिपकराव चव्हाण यांनी केले आहे.
सदर पुनरीक्षण कार्यक्रमांतर्गत मतदार नोंदणी, मतदार नोंद दुरुस्ती, मतदार यादीतून नाव वगळणे वगैरे कामकाज करणे कामी आपले भागातील मतदान केंद्रस्तरीय अधिकारी (बीएलओ) हे सर्वांना सहकार्य करतील, याशिवाय ऑनलाईन Voter Helpline मोबाईल ॲप Voter Portal या संकेतस्थळ वरुन देखील घरबसल्या हे कामकाज करता येईल, त्याचा उपयोग करुन घ्यावा असे आवाहन आ.श्रीमंत रामराजे नाईक निंबाळकर यांनी केले आहे.