अख्खा सातारा कंटेनमेंट झोन म्हणून जाहीर झाला आहे तिथे काही जणांची टक्केवारीची उबळ अजूनही गेलेली नाही . गृहराज्यमंत्र्यापुढे कामाचा आव आणणारे प्रशासनातले नमुने अजूनही कागदी घोडे नाचवत असल्याने करोनाशी खऱ्या अर्थाने झुंजणाऱ्याची कोंडी होऊ लागली आहे .
गुडगुडी बाबाच्या वादग्रस्त दुबई वारीची धूळ आता खाली बसू लागली आहे . ती धूळ मॅनेज करण्यात मुख्याधिकारी शंकर गोरे यांचा फार मोठा वाटा आहे .गोरेंचे प्रशासकीय मॅनेजमेंट आणि त्याचे आराखडे त्यांच्या डायरीत असतात , सध्या साहेबांनी करोनाची इतकी भीती घेतली आहे की आपल्या डायरीला सुध्दा ते शिपायाला हात लावून देत नाहीत खुर्चीत बसून त्यांनी कंटेनमेंट सातारा झोनचा कारभार चालवला आहे . मात्र गुडगुडी बाबाला सातत्याने वादग्रस्त ठरूनही कोणतीही विशेष जवाबदारी देण्यात आली नाही . बाबांचा एक डोळा सतत खजिना विभागावर लक्ष ठेवून असतो . इथे टक्केवारी आणि वाटप सारे काही ‘ विवेका ‘ ने चालते . इथे पाच टकक्यांची विवेकबुद्धी कोणाच्या व्यवस्थेसाठी वापरली जाते . म्हणूनच कमिटी हॉलच्या बंद दरवाजा मागे नक्की काय कामे चालतात हे कोणालाच समजून दिले जात नाही . सध्या 1 कोटी 95 लाखांचे अनुदान चालू महिन्यासाठी पालिकेला प्राप्त झाले आहे .व वित्त आयोगाचे दरवाजेसुद्धा करोना प्रतिबंधासाठी खुले आहेत .
त्यामुळे कंटेनमेंट झोनच्या आरोग्य तपासणीत गुडगुडी बाबा हातात थर्मल स्कॅनर घेऊन फोटो सेशन करतात मात्र मिळणाऱ्या बिलांची टक्केवारी आणि त्याचे वाटप हा खरा कलमी कार्यक्रम असतो . या वाटपाच्या कार्यक्रमातही आपण किती धुतले तांदूळ आहोत याचा हवाला गुडगुडी बाबा त्यांच्या अधिकाऱ्यांना देतात . साहेब तुम्ही हजर झाल्याशिवाय कोणतेही वाटप होणार नाही असे पावशेर ठेवत ते साहेबालाच दमात घेण्याचा प्रयत्न करतात . इथे राज्य संवर्ग सुध्दा विलक्षण चटावलेला बनल्याने सगळेच लक्ष्मी दर्शन सोयीस्करपणे सुरू आहे . या चौकटीतल्या संभाषणाचे रेकॉर्डिंग पालिकेत वाजायला लागल्यावर भल्याभल्यांच्या झोपा उडतात . आपली नैतिकता व सचोटी कोणी व किती टकक्यात गहाणं ठेवली याचे ते संभाषणं असल्याने या कोरोना वॉरियर विषयी असणारा आदर गळून पडतो . सातारकरांच्या पैशांवर तुंबडी भरणाऱ्यांवर कठोर कारवाई करण्याची राणा भीमदेवी थाटातील गर्जना काही नगरसेवक करतात . पण अधिकारी व पदाधिकारी ह एकाच थाळीचे चट्टेबट्टे आहेत . यामध्ये गुडगुडी बाबा कळीचा नारद आहे आणि या नारदाच्या नारायणाला बारामतीला जायची स्वप्ने पडत आहेत . मुख्याधिकारी गोरेंनी मध्यंतरी नोटीस बजावण्याचे नाटक खुबसुरत वठवले त्याचा खुलासा गुडगुडी बाबाने ब्लॅक डॉगच्या पेगमध्ये बुडवून ठेवला ( अर्थात हा स्टॉक लॉक डाऊनच्या आधीचा आहे . उगाच शंका नको )
कालच गृहराज्यमंत्री सगळा राजकीय प्रोटोकॉल बाजूला ठेऊन चक्क यामाहा दुचाकीवर पालिकेत हजर झाले . त्याची खरी गरज प्रत्यक्ष तिथे मराठवाडयात वाशिम जिल्हयात आहे आता हेच मुख्यमंत्र्यांनी त्यांच्या कानात सांगण्याची वेळ आली आहे . असो उगाच राजकीय शिष्टाचार मोडायला नको . गृहराज्यमंत्र्यापुढे नारद- आणि नारायणाने साताऱ्यातील लागू उपाययोजनांची पोपटपंची केली . तेव्हा ते सुध्दा खुश झाले .
करोना साठी तळागाळात जीव धोक्यात घालणारा कर्मचारी सुविधांसाठी तडफडतो आहे आणि इकडे गुडगुडी बाबाला अजूनही टक्केवारीची उबळ येते , ती कशी ? तर पालिकेच्या सोलापूरच्या ठेकेदाराला फोन करून नक्की विचारा .
