खंडाळा तालुक्यातील वाण्याचीवाडी ग्रामपंचायतीची निवडणूक अर्ज भरण्याच्या शेवटच्या दिवशीच बिनविरोध झाली . तीन प्रभागांमधुन सात सदस्य निवडण्यात येणार होते . पुढारीचे वृत्त संपादक हरीष पाटणे यांच्या मार्गदर्शनाखाली ग्रामस्थांनी बैठक घेऊन सात सदस्यांची बिनविरोध निवड केली . अर्ज भरण्याच्या शेवटच्या दिवशी सातही उमेदवारांनी आपले अर्ज निवडणूक निर्णय अधिकाऱ्यांकडे सादर केले . गत पन्नास वर्षापासुन बिनविरोध निवडणुक करणारे सातारा जिल्ह्यातील पहिले गाव होण्याचा मान वाण्याचीवाडी ग्रामपंचायतीने मिळवला .
वाण्याचीवाडी येथील चौणेश्वर वार्ड क्र .1 मधुन संदीप बबन भिलारे ( सर्वसाधारण पुरुष ) , रत्नमाला अनिल महाजन ( ओबीसी महिला ) , रत्नमाला ताराचंद मोरे ( सर्वसाधारण महिला ) हनुमान वार्ड क्र .2 मधून शंकर राजाराम पाटणे ( सर्वसाधारण पुरुष ) , विजया प्रकाश भिलारे ( सर्वसाधारण महिला ) लक्ष्मीनारायण वार्ड क्र .3 मधून प्रिया प्रमोद भिलारे ( सर्वसाधारण महिला ) , सतिश रामचंद्र महाजन ( ओबीसी पुरुष ) अशा सात जणांनी आपले उमेदवारी अर्ज दाखल केले .विरोधी अर्ज दाखल न झाल्याने वाण्याचीवाडी ग्रामपंचायत निवडणुक बिनविरोध झाल्याचे स्पष्ट झाले .
सर्वानी उमेदवारी दाखल केल्यानंतर पंचायत समितीच्या प्रांगणातील स्व . यशवंतराव चव्हाण यांच्या पुतळ्यास अभिवादन केले . गावची एकजुटीची परंपरा राखीत गावच्या विकासासाठी एकदिलाने काम करू. अशा प्रतिक्रीया उमेदवारांनी व्यक्त केल्या .
