सातारा पालिकेच्या 36 कर्मचाऱ्यांनी सहाव्या वेतन आयोगाच्या मंजुरीसह कायम स्वरूपी सेवेकरिता शुक्रवारी दि24 रोजी लाक्षणिक उपोषणाचा इशारा दिला आहे . कर्मचाऱ्यांच्या या आंदोलनामुळे पालिकेचे कामकाज विस्कळीत होणार आहे .
पदांचा आकृतीबंध व व्यपगत झालेल्या पदांची चुकीची माहिती नगरपालिकेकडून सादर झाल्याने 36 कर्मचाऱ्यांना आस्थापनेत सामावून त्यांना वेतन आयोगाचा लाभ देण्याच्या कामाची प्रचंड अडचणं झाली आहे . गेल्या सतरा वर्षापासून छत्तीस कर्मचारी पुनर्वसनाचा कायदेशीर लढा देत असताना लोकप्रतिनिधी व पालिका प्रशासनाच्या इच्छाशकतीच्या अभावामुळे हा प्रश्न लोंबकळत राहिला आहे . त्यामुळे 36 कर्मचाऱ्यांनी गुरुवारी बैठक घेऊन शुक्रवारी दि 24 रोजी लाक्षणिक उपोषणाचा इशारा मुख्याधिकाऱ्यांना दिला आहे . या कर्मचाऱ्यांना तत्काळ सहाव्या व सातव्या वेतन आयोगाचा लाभ देण्यात यावा अशी कर्मचाऱ्यांची मागणी आहे . नगर परिषद संचालनालयाच्या आदेशानंतर सहावा वेतन आयोगाचे लाभ देण्याची पत्रे मुख्याधिकारी शंकर गोरे यांनी स्वतःच्या सहीने16 ऑगस्ट 2016 रोजी वितरित केली होती . मात्र तेच मुख्याधिकारी आज या आदेशाची अंमलबजावणी करण्यास नकार देत आहेत . त्यामुळे ३६ कर्मचारी व मुख्याधिकारी यांच्यात खटके उडू लागले आहेत . त्यामुळे कर्मचाऱ्यांनी पालिकेच्या कार्यालयासमोर शुक्रवारी दि 24 लाक्षणिक उपोषण व रविवार दि 26 रोजी आत्मदहन आंदोलन करण्याचा इशारा दिल्याने पालिका वर्तुळात एकच खळबळं उडाली आहे .
