सातारा : सातारा जिल्हा मध्यवर्ती सहकारी बँकेच्या निवडणुकीतील जागावाटपाचा तिढा सोडवण्यासाठी मुंबईत महत्त्वाची बैठक होणार असल्याची चर्चा आहे. मंत्रिमंडळाच्या बैठकीनंतर मंत्री शिवेंद्रसिंहराजे भोसले, मंत्री मकरंद पाटील आणि आमदार धैर्यशील कदम यांच्यात जिल्हा बँकेच्या निवडणुकीसंदर्भात चर्चा होणार असल्याने संपूर्ण सातारा जिल्ह्याचे लक्ष मुंबईतील या घडामोडींकडे लागले आहे.
जिल्हा बँकेच्या निवडणुकीत महायुतीतील घटक पक्षांमध्ये जागावाटपावर एकमत होणार का, याकडे राजकीय वर्तुळाचे लक्ष आहे. कोणत्या पक्षाला किती जागा मिळणार, कोणत्या मतदारसंघात कोणाला संधी दिली जाणार आणि उमेदवारीबाबत नेमका कोणता फॉर्म्युला ठरणार, यावर या बैठकीत चर्चा होण्याची शक्यता आहे.
वाटाघाटी की पक्षाच्या चिन्हावर लढत?
जिल्हा बँकेच्या निवडणुकीत परस्पर सामंजस्यातून जागावाटप करून एकत्रित निवडणूक लढवायची की जागावाटपावर एकमत न झाल्यास भाजपसह संबंधित पक्षांनी स्वतंत्रपणे पक्षाच्या चिन्हावर निवडणूक लढवायची, हा महत्त्वाचा प्रश्न आहे. त्यामुळे मुंबईतील बैठकीत केवळ जागावाटपच नव्हे, तर निवडणुकीची पुढील राजकीय दिशा स्पष्ट होण्याची शक्यता आहे.
महायुतीतील चर्चेला यश आले तर निवडणुकीचे गणित वेगळे असेल; मात्र वाटाघाटी फिस्कटल्यास जिल्हा बँकेच्या निवडणुकीत स्वतंत्र लढतींचे चित्र निर्माण होऊ शकते. त्यामुळे नेत्यांच्या चर्चेतून कोणता तोडगा निघतो, याबाबत उत्सुकता आहे.
अध्यक्षपदाच्या गणितावरही नजर
जिल्हा बँकेच्या निवडणुकीत जागावाटपाबरोबरच आगामी अध्यक्षपदाच्या राजकीय गणितालाही महत्त्व प्राप्त झाले आहे. निवडणुकीनंतर बँकेच्या सत्तेची सूत्रे कोणाच्या हाती जाणार, अध्यक्षपदावर कोणाची दावेदारी राहणार आणि त्यासाठी पक्षीय पातळीवर कोणती रणनीती आखली जाणार, याचे संकेतही या चर्चेतून मिळू शकतात.
मुंबईतील बैठकीत जागावाटपाचा फॉर्म्युला ठरणार की स्वतंत्र निवडणुकीचा मार्ग मोकळा होणार, यावर सातारा जिल्हा बँकेच्या निवडणुकीतील पुढील राजकीय समीकरणे अवलंबून राहणार आहेत.
