सातारा | सातारानामा
सातारा जिल्ह्यात भारतीय जनता पक्षाकडे आमदार, खासदार, मंत्री आणि स्थानिक पातळीवरील दिग्गज नेत्यांची मोठी फौज असताना पुणे पदवीधर मतदारसंघात राष्ट्रवादी काँग्रेस (शरदचंद्र पवार) पक्षाच्या हर्षदा देशमुख-जाधव यांनी मिळवलेले यश भाजपसाठी आत्मपरीक्षण करायला लावणारे ठरले आहे. या निकालामुळे भाजपचे सातारा जिल्हाध्यक्ष आमदार डॉ. अतुल भोसले यांच्या नेतृत्वावर आणि संघटनात्मक कामगिरीवर प्रश्न उपस्थित होऊ लागले आहेत.
सातारा जिल्ह्यात भाजपची ताकद वाढविणे, कार्यकर्त्यांना एकत्र ठेवणे आणि पक्षाची मते विजयात रूपांतरित करणे ही जिल्हाध्यक्ष म्हणून अतुल भोसले यांच्यासमोरील महत्त्वाची जबाबदारी आहे. मात्र,पदवीधर मतदारसंघाच्या निवडणुकीतील निकालाने ही जबाबदारी प्रभावीपणे पार पाडली जात आहे का, असा सवाल उपस्थित केला जात आहे.
जिल्ह्यात नेत्यांची फौज, तरीही भाजपची पीछेहाट का?
पुणे पदवीधर मतदारसंघाची निवडणूक भाजपने प्रतिष्ठेची केली होती. उमेदवार डॉ. स्मिता जाधव यांच्या प्रचारासाठी पक्षाने मोठ्या प्रमाणावर नेते आणि पदाधिकाऱ्यांना जबाबदाऱ्या दिल्या होत्या. तरीही हर्षदा देशमुख-जाधव यांच्या विजयामुळे भाजपच्या नियोजनातील त्रुटी, मतदारांशी असलेला संपर्क आणि स्थानिक पातळीवरील संघटनात्मक ताकद यांचा आढावा घेण्याची वेळ आली आहे.
सातारा जिल्ह्यात भाजपचे अनेक प्रभावशाली नेते असताना पदवीधर मतदारांमध्ये पक्षाला अपेक्षित यश का मिळाले नाही? नेत्यांच्या सभांमधून निर्माण झालेले वातावरण प्रत्यक्ष मतदानात उतरवण्यात अपयश आले का? की स्थानिक संघटनेचा आणि मतदारांचा संवाद कमी पडला? हे प्रश्न आता महत्त्वाचे ठरत आहेत.
अतुल भोसले यांना जिल्हाध्यक्षपद पेलवतेय का?
आमदारकी आणि जिल्हाध्यक्षपद या दोन वेगवेगळ्या जबाबदाऱ्या आहेत. मतदारसंघातील राजकीय ताकद आणि संपूर्ण जिल्ह्यात पक्षाचे संघटन उभे करण्याची क्षमता यांची कसोटी वेगळी असते. त्यामुळे पदवीधर निवडणुकीतील निकालाच्या पार्श्वभूमीवर अतुल भोसले यांच्या नेतृत्वशैलीचे मूल्यमापन होणे स्वाभाविक आहे.
जिल्हाध्यक्ष म्हणून त्यांनी पक्षवाढीसाठी नेमके कोणते ठोस उपक्रम राबवले? नाराज कार्यकर्त्यांना विश्वासात घेण्यासाठी काय प्रयत्न केले? जिल्ह्यातील सर्व तालुक्यांमध्ये पक्षाची पकड मजबूत करण्यासाठी कोणती रणनीती आखली? आणि निवडणुकीतील पराभवाची जबाबदारी स्वीकारून आगामी निवडणुकांसाठी काय बदल केले जाणार? या प्रश्नांची उत्तरे भाजप कार्यकर्त्यांना अपेक्षित आहेत.
