प्रबळ दावेदार असलेला नांदेडचा शिवराज राक्षे व मुंबई उपनगरचा पृथ्वीराज पाटील यांनी गादी विभागातून 66व्या महाराष्ट्र केसरी कुस्ती स्पर्धेच्या अंतिम फेरीत धडक दिली. दुसरीकडे माती विभागातून सोलापूरचा वेताळ शेळके व अकोल्याचा प्रशांत जगताप यांनी फायनल गाठली.
आता दोन्ही विभागातून कोण बाजी मारत महाराष्ट्र केसरी स्पर्धेची फायनल गाठणार आणि त्यानंतर कोण मानाची चांदीची गदा उंचावून महाराष्ट्र केसरी किताबाच्या जेतेपदाची गुढी उभारणार याकडे कुस्तीशौकिनांच्या नजरा लागल्या आहेत.
कर्जत येथील श्री संत सद्गुरू गोदड महाराज क्रीडानगरीत ही स्पर्धा सुरू आहे. उद्या सायंकाळी 5वा. अंतिम लढत रंगणार आहे. आमदार रोहित पवार यांच्यावर या स्पर्धेच्या नियोजनाची जबाबदारी असून शनिवारी त्यांनी तयारीचा आढावा घेतला. महाराष्ट्र केसरी स्पर्धेतील माती विभागासाठी सोलापूरचा वेताळ शेळके विरुद्ध सांगलीचा सनी मदने यांच्यामध्ये उपांत्य फेरीची लढत झाली. दुसऱ्या उपांत्य लढतीत अकोले येथील प्रशांत जगताप विरुद्ध नांदेडचा अनिल जाधव यांच्यात झाली.
