गावठी ७७ बाँबसह शिकारीचे साहित्य जप्त
वनविभागाची कारवाई; संशयिताची कोठडीत रवानगी
सातारा : तालुक्यातील अंबवडे बुद्रूक येथे, जंगल क्षेत्राजवळ दोन झोपड्यांची संशयावरून तपासणी करुन वनविभागाच्या फिरत्या पथकाने शिकारीसाठी वापरले जाणारे ७७ गावठी स्फोटके गोळे, तंगुस फासे ३४ मीटर, ३ लगोर, लोखंडी तराजू, पक्षी पकडण्यासाठी वापरला जाणारा लोखंडी पिंजरा असे साहित्य जप्त केले. या प्रकरणी एका संशयितास वनाधिकाऱ्यांनी अटक केली आहे. त्याला न्यायालयाने वनकोठडी सुनावणली आहे.
वनविभागाच्या फिरत्या पथकाचे प्रमुख सचिन डोंबाळे, वनरक्षक गजानन भोसले, दीपक गायकवाड़, विजय भोसले, पोलीस हवालदार सुहास पवार, राजेश वीरकर व दिनेश नेहरकर यांनी ही कारवाई यशस्वी केली.
वनाधिकाऱ्यांना बातमीदारामार्फत गोपनिय माहिती मिळाली. त्यानुसार, अंबवडे बुद्रूक गावच्या हद्दीत असेल्या दोन झोपड्यांची संशयावरून तपासणी करण्यात आली. त्यावेळी झोपड्यांत शिकारीसाठी वापरले जाणारे 77 गावठी स्फोटके गोळे व इतर साहित्य आढळून आले. कणकेच्या गोळ्यात हे गावठी बाँब लपवून ते जंगल क्षेत्रात रानडूकरांच्या वाटेवर ठेवले जातात. जेणे करुन डुकराने कणकेच्या वासाने त्याला तोंड लावले तर बाँबचा स्फोट होऊन डुक्कर मृत होते. या पद्धतीने रानडूकराची शिकार केली जाते. शिकारीच्या उद्देशाने हे गावठी बाँब तयार केले गेले होते.
घटनास्थळी तसबीर जहाज गौंड (रा. देवगाव, ता.रिठी, मध्यप्रदेश. हल्ली रा. अंबवडे बुद्रूक) याला अटक करण्यात आली आहे. सचिन डोंबाळे यांनी भारतीय वनअधिनियम 1927 कलम 26 (1) (आय), महाराष्ट्र वननियमावली 2014 नियम 9 (1) (क) (ह) व शस्त्रास्त्र बंदी कायद्याखाली गुन्हा दाखल केला आहे. सहाय्यक वनसंरक्षक विश्वास भडाळे व वनक्षेत्रपाल सौ. शितल राठोड यांच्या मार्गदर्शनाखाली परळीचे वनपाल राजू मोसलगी तपास करीत आहेत. संशयितास न्यायालयात हजर केले असता त्याची वनविभागाच्या कोठडीत रवानगी करण्यात आली.
———————————–
