कोरोनाच्या संकटात फ्रंटलाईन कर्मचारी म्हणून बँका आणि पतसंस्थांच्या कर्मचा-यांनी काम केले. त्याचे लसीकरण करण्यात यावे याबाबत 20 एप्रिल रोजी राज्य सहकार आयुक्तांनी सर्व जिल्हाधिका-यांना आदेश दिले होते परंतु सातारा जिल्हयात याबाबत कार्यवाही न झाल्याने सातारा जिल्हा पतसंस्था फेडरेशनचे संचालक आणि जनता सहकारी बँकेच्या भागधारक पॅनेलचे प्रमुख विनोद कुलकर्णी याबाबत कार्यवाही न झाल्यास जिल्हा प्रशासनाच्या विरोधात तीव्र आंदोलन करण्याचा इशारा निवेदनाव्दारे पालकमंत्री, सहकारमंत्री बाळासाहेब पाटील यांना दिला होता, याची दखल घेऊन पालकमंत्र्यांनी जिल्हाधिका-यांना तातडीने कार्यवाही करण्याचे आदेश दिले आहेत.
पालकमंत्र्यांना दिलेल्या निवेदनात, कोरोनाच्या संकटात फ्रंटलाईन कर्मचारी म्हणून बँका आणि पतसंस्थांच्या कर्मचा-यांनी काम केले आहे. त्यांना फिल्डवर राहूनच लोकांना सेवा द्यावी लागली आहे. दुर्देवाने केंद्र सरकार आणि राज्यसरकार यांनी सर्व कर्मचा-यांचा लसीकरण कार्यक्रमात समावेश केला. परंतु बँका आणि पतसंस्था यांच्या कर्मचा-यांकडे दुर्लक्ष केले. त्यांना सापत्न वागणूक दिली, त्यामुळे अनेक कर्मचा-यांना कोरोना रोगाचा प्रादुर्भाव झाला. राज्यातील शेकडो कर्मचा-यांचा मृत्यूही झाला. राज्य सरकारच्या ब्रेक दी चेन आदेशान्वये सर्व बँका व पतसंस्था आजही कार्यरत आहेत. सहकारी बँका व पतसंस्था या नागरिकांच्या आर्थिक बाबींशी निगडीत असल्याने यामधील कर्मचा-यांचा शासकीय कर्मचा-यांप्रमाणे सामान्य जनतेशी अधिक संपर्क येतो. त्यामुळे त्यांना मोठया प्रमाणावर कोरोना विषाणूची लागण होण्याची शक्यता नाकारता येत नाही. सहकारी बँका व पतसंस्था या राष्ट्रीयकृत बँकांप्रमाणे नागरिकांची आर्थिक गैरसोय टाळण्यासाठी सद्यस्थितीत कार्यरत असल्याने त्यामध्ये काम करणा-या अधिकारी व कर्मचा-यांची लसीकरण करणेबाबत आवश्यक ती कार्यवाही तातडीने करावी. त्यासाठी महाराष्ट्र राज्य सहकार आयुक्त व निबंधक अनिल कवडे यांनी दि. 20 एप्रिल रोजी राज्यातील सर्व जिल्हाधिका-यांना लसीकरणाबाबत आदेश दिले आहेत. त्या आदेशाची अंमलबजावणी तातडीने सातारा जिल्हयात करावी अन्यथा तीव्र आंदोलनाची भूमिका घ्यावी लागेल. याबाबत चार दिवसात निर्णय न झाल्यास बँका आणि पतसंस्थांच्या कर्मचारी व संचालकांना घेऊन जिल्हा प्रशासनाच्या विरोधात तीव्र आंदोलन करण्यात येईल याची नोंद घ्यावी असा इशारा देण्यात आला होता. या निवेदनाची पालकमंत्री व सहकारमंत्री बाळासाहेब पाटील यांनी त्वरित दखल घेऊन जिल्हाधिका-यांना याबाबत तातडीने कार्यवाही करण्यात आदेश दिले आहेत, अशी माहितीही जिल्हा पतसंस्था फेडरेशनचे संचालक आणि जनता सहकारी बँकेच्या भागधारक पॅनेलचे प्रमुख विनोद कुलकर्णी यांनी दिली आहे.
