लोकांच्या हितासाठी काम करण्याची आमची एक पध्दत आहे आमची धडाडी व लोकप्रियता खुपणाऱ्यांकडून आमच्यावर सातत्याने भ्रष्टाचाराचे आरोप केले जात आहेत .सहकारात स्वाहाकार करणारे आमच्यावर भ्रष्टाचाराचे आरोप करतात म्हणजे चोराच्या उलट्या बोंबा आहेत अशा घणाघाती शब्दात खासदार श्री छ उदयनराजे भोसले यांनी आमदार शिवेंद्रसिंहराजे भोसले यांच्या आरोपांना जोरदार प्रत्युत्तर दिले आहे .
आमदार शिवेंद्रसिंहराजेंनी उदयनराजेंचा इनोव्हेटीव्ह सातारा हा उपक्रम पालिका निवडणुकीनंतर बासनात जाणार असे साेमवारी घेतलेल्या पत्रकार परिषदेत म्हटलं हाेते. शिवेंद्रसिंहराजे यांच्या वक्तव्याचा उदयनराजे यांनी जोरदार समाचार घेतला .
खा श्री छ उदयनराजे पुढे म्हणाले, “जनमानसात आमची एक वेगळी छबी आहे. आम्ही सामान्य जनतेकरीताच आजपर्यंत जीवन व्यतीत केले आहे. काहींना आमची धडाडी आणि लोकप्रियता खुपत असते म्हणूनच कथित भ्रष्टाचाराचे मोघम आणि बिनबुडाचे आरोप करणे हा त्यांचा स्थायी भाव बनला आहे. लोकांच्या गतीमान सोयी, सुविधांसाठी कोणत्या योजना राबविणे. लोकहिताची अंमलबजावणी करणे ही जर भ्रष्टाचाराची व्याख्या असेल तर होय.. आम्ही भ्रष्टाचार केला आहे असे उदयनराजे ठामपण म्हटलेत.
स्वार्थ्याच्या भ्रष्टाचारात आकंठ बुडालेल्यांनी भ्रष्टाचाराचे आरोप करणे म्हणजे चोराच्या उलट्या बोंबा आहेत. सहकाराचा गळा घोटुन स्वाहाकार करुन आता रियल इस्टेटमध्ये घुसलेल्या व्यक्तींनी आजपर्यंत फक्त स्वार्थ पाहिलेला आहे. स्वार्थ नसेल तर त्यांचा कोणताही उपक्रम होत नाही अशा व्यक्तींना निस्वार्थीपणे नागरीकांच्या हितासाठी काम करणाऱ्या व्यक्तींची वाढती लोकप्रियता सहन होणारी नाही म्हणून त्यांची नेहमीच कुरकूर असते.
खा श्री छ उदयनराजें हे नेहमीच समाजासाठी जगणारी व्यक्ती म्हणून उभ्या महाराष्ट्राला परिचित आहे. कुणी कितीही उलट्या बोंबा मारत असले तरी त्या बोंबा मारणा-यांना समाजाने पुरते ओळखले आहे. शाश्वत विकासाच्या गप्पा ठोकणा-यांनी, चालवता आल्या नाहीत म्हणून दोन सहकारी बॅन्कांचे विलिनीकरण केले. तरीही उजळ माथ्याने हिंडणा-यांचा सहकारातील अचंबित करणारा शाश्वत विकास सभासद, नागरीकांनी पाहिला आहे. त्यांचे पोटात एक आणि ओठात एक या वैशिष्ठयाचा अनेकांना बसलेला झटका लोक विसरलेले नाहीत. म्हणून बेछुट, बेताल आरोप करुन, त्यांचा सुरु असलेला चारित्र हननाचा प्रयत्न यशस्वी होणार नाही.आम्ही त्यांच्या वक्तव्याला फारशी किंमतही देत नाही असे राजेंनी नमूद केले आहे.
